හිටපු දියවඩන නිළමේ නෙරංජන් විජේරත්න මහතා මෙවර මහනුවර මහ නගර සභා ඡන්දයේ එක්සත් ජාතික පක්‍ෂ (එජාප) කණ්ඩායම මෙහෙයවයි. පක්‍ෂ නායක රනිල් වික්‍රමසිංහ මහතා ඔහුට නායකත්වය පිරිනමා ඇත.

එක්සත් ජනතා නිදහස් සන්ධානයේ (එජනිස) නායකත්වය පසුගිය සභාවේ විපක්‍ෂ නායක ලෙස කටයුතු කළ  සේන දිසානායක මහතා අපේක්‍ෂා කළද එම පක්‍ෂයේ ඉහළ ආරංචි මාර්ග වලට අනුව නායකත්වය ඡන්දයට පසුව තීරණය කිරීමට කල් තබා ඇත.

මහනුවර මහ නගර සභාවට සභිකයින් 24 දෙනෙකු තේරීමට ලියාපදිංචි ඡන්දදායකයෝ 79,000 පමණ සිටිති. ලබන ඡන්ද සංඛ්‍යාවේ අනුපාතය අනුව පක්‍ෂ හෝ ස්වාධීන කණ්ඩායම් ලැයිස්තුවට ආසන 22ක් හිමිවේ. පැවතෙන  ඡන්ද ක්‍රමයට අනුව ඉතිරි අසුන් දෙක ජයග්‍රාහී පක්‍ෂයට ලැබේ.

පසුගිය මාස නවය තුළ පුරපතිවරයා ලෙස සේවය කළ රාජා පුෂ්පකුමාර මහතා (එජාප) පැවසුවේ තම පක්‍ෂ නායකත්වයට නිරංජන් විජේරත්න මහතා පත්කිරීමට ගත් තීරණයට ඔහු හිස නමන බවයි. අනෙක් අතට එක්සත් ජනතා නිදහස් සන්ධානයට කළක් එකතුවී නගරාධිපතිධුරයේ වැඩ බලා ආපසු එජාපයට පැමිණි සුමින්ද වික්‍රමසිංහ මහතා කියා සිටියේ  මැතිවරණයේදී ලබා ගන්නා මනාප ඡන්ද  සංඛ්‍යාව  මත නගරාධිපතිධුරය ලබාදීම එජාපයේ  තීරණය  බවයි.

මේ අතර හිටපු නගරාධිපති කේසර සේනානායක මහතා ද එජාප අපේක්‍ෂකයකු ලෙස මෙවර නැවතත් තරඟ වදී. ඔහුට විරුද්ධව දුන් නඩු තීන්දුවෙන් ජනාධිපති සමාවක් ලැබීම නිසා මෙසේ නැවතත් තරඟ කිරීමට අවස්ථාව ලැබී ඇති බව ආරංචි මාර්ග පවසයි. සේනානායක මහතා නිරංජන් විජේරත්න මහතාගේ පත්වීම ගැන කියා සිටියේ එම පත්වීම නිසා නගර සභා ඡන්දයට ඉදිරිපත්වන එක්සත් ජාතික පක්‍ෂ කණ්ඩයම තුල යම් යම් මතභේද ඇතිවී ඇති බවයි.

සන්ධානයේ හිටපු ජ්‍යෙෂ්ඨ නගරසභිකයෙකු වන නීතිඥඑම්.පී. ජයසිංහ මහතාට මෙවර අපේක්‍ෂකත්වය ලැබී නැත. ඔහු නගරාධිපති වීමට අපේක්‍ෂාවක් ඇතිව සිටි අයෙකි. මේ අතර හිටපු ආරක්‍ෂක ඇමති අනුරුද්ධ රත්වත්තේ මහතාගේ දෙවෙනි පුත් මහින්ද්‍ර රත්වත්තේ මහතා ආණ්ඩු පක්‍ෂයේ අපේක්‍ෂකයෙකු වශයෙන් තරඟ වදී. ඔහුගේ ඉදිරිපත්වීම නිදහස් සන්ධානයේ නායකත්වය පිළිබඳ  අලූත් පැනයක් මතු කරයි.